ប្រែសម្រួល៖ រតនា

មេដឹកនាំអឺរ៉ុបត្រូវជួបប្រជុំគ្នានៅទីក្រុងប៉ារីសនៅថ្ងៃចន្ទ (ថ្ងៃទី១៧ ខែកុម្ភៈ) ដើម្បីដោះស្រាយការផ្លាស់ប្តូរគោលនយោបាយដ៏គួរឱ្យភ្ញាក់ផ្អើលរបស់វ៉ាស៊ីនតោនទាក់ទងនឹងសង្គ្រាមនៅអ៊ុយក្រែន ខណៈដែលចក្រភពអង់គ្លេសបានប្រកាសថាខ្លួនត្រៀមខ្លួនរួចរាល់ក្នុងការបញ្ជូនកងកម្លាំងរក្សាសន្តិភាពទៅកាន់អ៊ុយក្រែន។

ប្រធានាធិបតីសហរដ្ឋអាមេរិក ដូណាល់ ត្រាំ បានទុកគៀវនិងដៃគូអឺរ៉ុបនៅក្រៅឆាកកាលពីសប្តាហ៍មុន នៅពេលដែលលោកបានទូរសព្ទទៅកាន់សមភាគីរុស្ស៊ីរបស់លោកគឺលោក វ្លាឌីមៀរ ពូទីន ដើម្បីពិភាក្សាអំពីការចាប់ផ្តើមការចរចាបញ្ចប់ជម្លោះ។

កិច្ចប្រជុំកំពូលក្រៅផ្លូវការរបស់មេដឹកនាំអឺរ៉ុបដែលត្រូវរៀបចំឡើងយ៉ាងប្រញាប់ប្រញាល់ គ្រោងនឹងចាប់ផ្តើមនៅម៉ោង៤ល្ងាចម៉ោងក្នុងស្រុក បន្ទាប់ពីលោកត្រាំបាននិយាយថា លោកអាចជួបជាមួយលោកពូទីន “នាពេលឆាប់ៗនេះ”។

កិច្ចប្រជុំដែលរៀបចំឡើងដោយប្រធានាធិបតី អេម៉ាញ៉ូអែល ម៉ាក្រុង នៅវិមានអេលីសេ នឹងប្រមូលផ្តុំប្រមុខរដ្ឋាភិបាលនៃប្រទេសបារាំង អាល្លឺម៉ង់ អង់គ្លេស អ៊ីតាលី ប៉ូឡូញ អេស្ប៉ាញ ហូឡង់ និងដាណឺម៉ាក ក៏ដូចជាប្រមុខក្រុមប្រឹក្សាអឺរ៉ុប គណៈកម្មការអឺរ៉ុប និងអង្គការណាតូ។

សង្គ្រាមនៅអ៊ុយក្រែននឹងឈានដល់ខួបទីបីនៅថ្ងៃទី២៤ ខែកុម្ភៈ។

លោក គា ស្តាមឺ នៃចក្រភពអង់គ្លេស បាននិយាយកាលពីថ្ងៃអាទិត្យថា លោកមានឆន្ទៈក្នុងការដាក់ “កងទ័ពរបស់យើងនៅលើទឹកដីប្រសិនបើចាំបាច់” ជាការឆ្លើយតបទៅនឹងអ្វីដែលលោកហៅថា “ពេលវេលាដ៏សំខាន់ក្នុងមួយជំនាន់សម្រាប់សន្តិសុខរួមនៃទ្វីបរបស់យើង”។

លោកត្រាំបាននិយាយថា លោកជឿថាលោកពូទីនពិតជាចង់បញ្ឈប់ការប្រយុទ្ធគ្នានៅអ៊ុយក្រែន ខណៈដែលរដ្ឋបាលរបស់លោកបានព្រមានសម្ព័ន្ធមិត្តណាតូថា អឺរ៉ុបនឹងលែងជាអាទិភាពសន្តិសុខកំពូលរបស់ខ្លួនទៀតហើយ។

ប្រមុខការពារជាតិអាមេរិក លោក ភីត ហេកស៍សេត ក៏ហាក់ដូចជាបានបដិសេធការចូលរួមរបស់អ៊ុយក្រែនក្នុងអង្គការណាតូ ឬការយកមកវិញនូវទឹកដីទាំងអស់ដែលបាត់បង់តាំងពីឆ្នាំ២០១៤។

កិច្ចប្រជុំនេះនឹងដោះស្រាយ “ស្ថានភាពនៅអ៊ុយក្រែន” និង “សន្តិសុខនៅអឺរ៉ុប” នេះបើតាមការថ្លែងរបស់ប្រធានាធិបតីបារាំង។

“ដោយសារតែការបន្តឿនបញ្ហាអ៊ុយក្រែន និងជាលទ្ធផលនៃអ្វីដែលមេដឹកនាំអាមេរិកកំពុងនិយាយ មានតម្រូវការឱ្យជនជាតិអឺរ៉ុបធ្វើឱ្យបានច្រើនជាងមុន ប្រសើរជាងមុន និងក្នុងរបៀបដែលស៊ីសង្វាក់គ្នា សម្រាប់សន្តិសុខរួមរបស់យើង” នេះជាការលើកឡើងរបស់ទីប្រឹក្សាម្នាក់នៅការិយាល័យរបស់លោកម៉ាក្រុង។

ក្រឹមឡាំងបានជំរុញឱ្យមានការចរចារវាងមន្ត្រីអាមេរិកនិងរុស្ស៊ីនៅប្រទេសអារ៉ាប៊ីសាអូឌីត ដែលរំពឹងថានឹងធ្វើឡើងនាពេលខាងមុខនេះ ដើម្បីពិភាក្សាមិនត្រឹមតែអំពីជម្លោះអ៊ុយក្រែនប៉ុណ្ណោះទេ ប៉ុន្តែក៏អំពីសន្តិសុខអឺរ៉ុបទូទៅផងដែរ។

• «ការលោតផ្លោះទៅមុខ»

ប្រទេសអឺរ៉ុបភ័យខ្លាចថា លោកពូទីនអាចនឹងលើកឡើងវិញនូវការទាមទារដែលលោកបានធ្វើឡើងមុនការឈ្លានពានឆ្នាំ២០២២ ទាក់ទងនឹងការកំណត់កម្លាំងណាតូនៅអឺរ៉ុបខាងកើត និងការចូលរួមរបស់អាមេរិកនៅលើទ្វីបនេះ។

ទោះយ៉ាងណា រដ្ឋមន្ត្រីការបរទេសអាមេរិក លោក ម៉ាកូ រូប៊ីយ៉ូ កាលពីថ្ងៃអាទិត្យបានព្យាយាមបន្ថយការរំពឹងទុកចំពោះការរីកចម្រើនណាមួយនៅក្នុងកិច្ចចរចាជាមួយមន្ត្រីរុស្ស៊ីនាពេលខាងមុខ។

“ដំណើរការឆ្ពោះទៅរកសន្តិភាពមិនមែនជាកិច្ចប្រជុំតែមួយលើកនោះទេ” លោកបានប្រាប់បណ្តាញ CBS។

“មិនទាន់មានអ្វីត្រូវបានសម្រេចនៅឡើយទេ” លោកបាននិយាយ ដោយបន្ថែមថា គោលបំណងគឺស្វែងរកឱកាសសម្រាប់ការសន្ទនាទូលំទូលាយដែល “នឹងរួមបញ្ចូលអ៊ុយក្រែន និងពាក់ព័ន្ធនឹងការបញ្ចប់សង្គ្រាម”។

លោករូប៊ីយ៉ូបានទៅដល់អារ៉ាប៊ីសាអូឌីតកាលពីថ្ងៃចន្ទ ក្នុងជំនួបដំណើរទស្សនកិច្ចមជ្ឈិមបូព៌ាដែលលោកបានចាប់ផ្តើមនៅចុងសប្តាហ៍នេះនៅអ៊ីស្រាអែល។

អ្នកតំណាងពិសេសរបស់លោកត្រាំសម្រាប់អ៊ុយក្រែន លោក ខីត ខេឡក បាននិយាយថា អឺរ៉ុបនឹងមិនចូលរួមដោយផ្ទាល់ក្នុងការចរចាស្តីពីអ៊ុយក្រែនទេ ទោះបីជានៅតែមាន “ការចូលរួមចំណែក” ក៏ដោយ។

រដ្ឋមន្ត្រីការបរទេសបារាំង លោក ហ្សង់-ណូអែល បារ៉ូត បាននិយាយកាលពីថ្ងៃអាទិត្យថា វាជាតួនាទីរបស់អឺរ៉ុបក្នុងការធានាកិច្ចព្រមព្រៀងសន្តិភាពណាមួយនៅអ៊ុយក្រែន ដោយបន្ថែមថា លោករំពឹងថាសហរដ្ឋអាមេរិកនឹង “ពិនិត្យឡើងវិញនូវកម្រិតនៃការប្តេជ្ញាចិត្តរបស់ខ្លួនចំពោះណាតូ រួមទាំងផ្នែកភូមិសាស្ត្រផងដែរ”។

ការផ្លាស់ប្តូរគោលនយោបាយអាមេរិក “តម្រូវឱ្យយើងពិតជាភ្ញាក់ឡើង និងសូម្បីតែធ្វើការលោតផ្លោះទៅមុខ ដើម្បីយកកន្លែងរបស់យើងសម្រាប់សន្តិសុខនៃទ្វីបអឺរ៉ុប” លោកបារ៉ូតបាននិយាយ។

លោកបានប្រាប់ប្រព័ន្ធផ្សព្វផ្សាយ LCI ថា ការចរចាកំពុងដំណើរការរួចទៅហើយ ដោយមានការចូលរួមជាពិសេសពីប្រទេសបារាំង អង់គ្លេស និងប៉ូឡូញ ដើម្បីធានាឱ្យមានការបញ្ឈប់បាញ់នាពេលអនាគត និង “សន្តិភាពយូរអង្វែង” នៅអ៊ុយក្រែន។

ប្រធានាធិបតីអ៊ុយក្រែន លោក វ៉ូឡូឌីមៀរ សេឡិនស្គី បាននិយាយកាលពីថ្ងៃសៅរ៍ថា ទ្វីបអឺរ៉ុបត្រូវបង្កើតកងទ័ពអឺរ៉ុប ដោយលើកឡើងថា ទ្វីបនេះលែងអាចពឹងផ្អែកលើវ៉ាស៊ីនតោនទៀតហើយ៕

ប្រភព៖ AFP/fh